2018 оны 9 дугээр сарын сүүлийн арав хоногт ХАА-н үйлдвэрлэлд цаг агаарын байдал хэрхэн нөлөөлсөн тухай тойм

Агаарын температур: Агаарын дундаж температур энэ арав    хоногт  Тариат,  Хангай,  Цахир, ӨндөрУлаан   сумдын нутгаар  1.7 - 2.8 градус ,  бусад сумдын нутгаар  3.6 – 7.3 градус дулаан байв. Агаарт өдөртөө  аймгийн нийт сумдын нутгаар 16.0 – 21.0  градус   дулаан байлаа.   Агаарт шөнөдөө  Хангай, Чулуут, Булган, Тариат сумдын  нутгаар  8.0 -11.0   градус , бусад сумдын нутгаар 2.0 – 7.0 градус хүйтэн байв. Агаарт 30 градусаас дээш дулаарсан өдөр  ажиглагдаагүй байна.

Хөрсний гадаргын температур: Хөрсний  гадаргын  дундаж  температур  энэ арав хоногт аймгийн бүх сумдын нутгаар  5.0 - 11.0 градус   дулаан байлаа.  Хөрсний гадарга дээр  өдөртөө Эрдэнэмандал, Өлзийт, Өгийнуур сумдын нутгаар 42.0 – 44.0  градус, бусад сумдын нутгаар 32.0-37.0 градус дулаан  байв. Хөрсний гадарга дээр шөнөдөө  Тариат сумын нутгаар 13.0 градус, бусад сумдын нутгаар 3.0 – 9.0 градус хүйтэн  байлаа. Хөрсний  гадарга дээр 40 градусаас дээш дулаарсан өдөр Өлзийт, Өгийнуур, Эрдэнэмандал  сумдын нутгаар 2-3 өдөр  ажиглагдсан байна.

Хур тунадас: Энэ арав хоногт  1-4 өдөр хур тунадас  орж ,  0,5 – 26,9 мм тунадас  унасан  байна. Хамгийн их тунадас Булган сумын нутгаар  26,9  мм,  Өгийнуур сумын нутгаар  хамгийн бага тунадас  0,5 мм  унасан байна. 

Салхи: Энэ  арав  хоногт  аймгийн  нийт нутгаар  салхины хамгийн их хурд секундэт 7-17 метр хүртэл  ширүүссэн бөгөөд   хамгийн  их хурд нь  Эрдэнэмандал сумын  нутгаар секундэт 17  метр хүрч аюулын хэмжээнд хүрсэн байв. Бусад сумдын нутгаар  секундэт 7 - 14  метр хүрсэн  байна. 10 м/с дээш салхитай  өдөр  Эрдэнэмандал   Эрдэнэбулган,  Тариат, Батцэнгэл, Чулуут, Өлзийт, Өгийнуур, Хотонт, Хайрхан, ӨндөрУлаан  сумдын  нутгаар   1-4  өдөр   ажиглагджээ.

Ургамал бүрхүүл:Энэ   арав хоногийн мэдээгээр аймгийн нийт нутгаар  бэлчээрийн ургамлын  хаталт, хагдралтын үе шат жигдэрсэн байна.

Бэлчээрийн хөнөөлт хортон шавьж,мэрэгчид:Энэ арав хоногт Төвшрүүлэх сумын  нутгаар   1м² талбайд 1  ширхэг бэлчээрийн хортон  царцаа  ажиглагдсан байна.Бусад сумдын нутгаар ажиглагдаагүй байв.

ХАА-н үйлдвэрлэлд цаг агаарын нөлөөлөл :МАА-н үйлдвэрлэлд бод мал хээлтүүлэх, мал оторлох, хужир шүү бэлтгэх, өвс хадлан авах  зэрэг  ажлууд явагдаж байна. Малын усан хангамж  Хотонт, Хашаат, Батцэнгэл сумдын  нутгаар дунд ,  бусад сумдын нутгаар  сайн байна. 

                                              ЦУОТХ-ийн дарга бөгөөд,  ХААЦУ-ын инженер Н.Галдигмаа